كلنا فاسدون!

و فقدت يا بلدي البكارة ...

و شهدنا فضها,

مسحوا عنك آخر رمق للطهارة !

و صعب و لو اردنا، ردها ...

كلنا فاسدون! 

إما سكوتاً وإما كلاما .

عاجزين, راكعين, خاضعين ,

وقفنا أمامك حطاما ...

خانعين, صاغرين, خائنين ,

ألمك يزيدنا سقاما ...

كلنا فاسدون يا بلدي ! 

سئنا وشقيت في تخاذلنا اعواما ...

حسرة عليك يا بلدي ! 

كيف طبت للظلام مقاما ؟؟

اذ زادهم ضعفنا على هجرك إرغاما...

كلنا فاسدون يا بلدي ! 

يا عاذلي

يا عاذلي في حبهم صمتاً ، ما همني في العشق وصلهم ,
تكفيني منهم نظرة ، تحييني فتقتل بعدها و ما عاب العشاق سفك دماهم ...
يا قاتلي في هواك ، ما بي رحمة, روحي في ظلمكم تنعم ,
زدني يزدك القوي قوة إن منعتها عن الملتاع يعدم ...

-فصام -

(لتفريغ ما يرسب بي لا بد لي من شيئين إثنين :الكتابة والموسيقى )

(ضجيجٌ في رأسي | إنتاج /غرض شعري http://soundcloud.com/jjameell/prod)

أنا1 لأنا : لسانك صوانك يا ب-شر !! سكر ز-مر اش مدخل عزاك في غيرك ؟ يتندب، يتنكب و لا حتى على فركة ركب !! إتلها في همك يا ديني!! حليلي, تتكلم إنت نوحل انا و ما تخسر علي كان دبر يا وزيري ... أيا ترى من قدامي هالساعة طيري ...

أنا2 لأنا : ''الله يلعن النت عالنتيتة علي بينتتو عليه'' مش قلت بش تسكرو الكونت اش مقعدك فيه سي أنا ، تره فسرلي ما جاينا من جرتك كان المشاكل و الهانة ، هاو وجهي كان تتبدل من هنا لين يقوموا رقود الجبانة !!

أنا لأنا1 وأنا2 : باهي باهي : التوبة بش نبطل الصنعة المعيوبة ، بش نعبيه تراب هالفم المشوم و نكسر الكيبورد المحموم ... وهوكا العين وتخزر و لا فم يحكي ولا يد تكتب ... ما قصدتش حبيت نخبي ما فلحتش ، شديت روحي برشة و ما نجمتش... ما نعرفش نكذب، ما نعرفش نخبي، تربيت كيف الكتاب ديمة محلول ما يتسكر كان إذا قبري علي زم يا موش كيف نقعد في الهم ... علاش هكا يا ربي حني يا موش كيف دهر في تربي ...

أنا 3 لأنا 1 وأنا2 وأنا4 : هعهعهعهع ، اش قلتلكم أنا ؟؟؟!!! بش توحلنا في مصيبة جديدة ماهي فيهم فالحة عديدة ، قلت سكتوها ولا ما قلتش !!! قداش سمعتو من مرة هالوعود وقداش من مشكلة خرجناها منها !! قلتكم حلين : يا تسكتوها يا تسكتو قلبها!! الحزين، نهار بش يودرنا و في جهنم يصدرنا ...

أنا4 لأنا : تسمع فيهم ماو تسمع!! قداش دافعت عليك وقداش كليت السب والشرمبة في بلاصتك و قداش فسخت وراك أغلاطك و قلة رباصتك و قداش مسحتلك دموعك يا متعوسة ورضيتك بتعنيقة وبوسة... كنت كيفك مشيت في طريقك وندمت؛ تكلمت، عهرت ، حجرت ،سخنت ، صحت و فرت ، وفي الأخر غصيت و عييت؛ تشويت ، هربت، طرت ،فقت وعليت ... فيق لا تندم كيف ندمي !!! وألي خفت عليه البارح يدغرك اليوم ، إسمع كلامي وفهمي راني كبرت ومالهم شاح عظمي ...

أنا: تي شبيكم علي ؟؟ بقلبي مبلية ... اش عملت من بلية ؟؟ لا خطفت لا نهبت ولا من كلمة رهبت... قولولي شبيكم علي؟؟ عالمحبة جبلني رب البرية وكيف ولات تهمة والصحبة عيب اش مازال في دنيتكم يحلى ويطيب ؟! هاني ماشية يا امالي خليتكم لا سو لا سوية ماليوم ما عادش ما تلوجو علي !!! ...

أنا 2 وأنا 4 : وين ماشية ايجا لنا !يا بنتي أقعد اش لزنا عالفراق والبعد والأشواق ؟ ايجا يا للة يا ريح الورد ونسمة الفلة ، ما قلنالك شي كان ابعد عالشر وغنيلو ، اخطاك منو لاك قد شوكو ولا تسهر في الظلم ليلو ...

أنا1 وأنا 3: بربي خليوها تمشي لعل يجي نهار وتفهمشي ... خليوها علاش شادينها ؟ بلاش بينا ما تنجمش تعيش تخاف تهبط ريش !! تو تدور تدور وترجع لقلب الرحى إذا قلبها قعد وما ترحى ... سيب خلينا نرتاحو ويحلالنا العيش و افراحو، سيب !!!

أنا لأنا 1 وأنا 3 : عليكم هنت بعد عزي ودلالي ، هكا يحصل!! وهكا يجرالي ؟؟

أنا لأنا : ما تاخوش عليهم الصغر والطيش عاميهم ، وسع بالك ، أنا نواسيك وإنت داويهم ... مصيرهم يفهموا وكان كبروا لاغيهم ... يزي مالغش اش عندك فيهم ...

أنا لأنا 1 وأنا 3 :العيب مش فيكم أما في صنعتكم و من روحي عطيتكم! وفي عقلي صنتكم وخبيتكم ... ماليوم أنا في شيرة و انتم في شيرة لا بينا كلام ولا زيارة , لجهنم في أول طيارة !!!

-فسخ وأخلق من جديد -

             

Original photo : Schizophrenia iii by Louise Leppard : http://tinyurl.com/cdmp6hx

ساعات

ساعات مش لازم تكون الحلمة حلمتك بش تحسها،
ومش لازم تكون الكلمة كلمتك بش تبدلك مشاعرك وعالنسيان تلزها ،
مش لازم تكون جراحك بش تهزها،
ومش لازم يكن الفرح حقيقة تمسها ...
ساعات ناس الوجع ليهم عنوان ،
ما يعرفوا كان الدموع والوجايع ليهم أوطان ...
مرات نوجعو ناس ونتوجعو...
ونندمو ونتوبو ...
وساعات الكره يعمينا ،
في طريق الشر يرمينا ،
وساعات نظرة حنينة، لمسة بنينة و كلمة خايفة علينا ،
على المر تواسينا،
مالظلام تهرب بينا...
مرات نتفكرك نجريلك نحب نكلمك ، نحب نحكيلك...
ساعات نكرهك ومن عقلي نفسخك , في قلبي نتحرق بش نحرقك ...
وساعات نكره روحي ونلعن دقيقة في ساعة من نهار عرفتك ...
ومرات نحب خيالك ، سحرك وأفنانك ،
ريقك البارد وعلي دلالك ؛
كلامك العسول ، البليد والماسط وسلامك ...
وضحكة عينيك تسبق تبسيمة شفافك ...
وساعات ننساك
ننسى العزيز والرخيص والباهي والتعيس ...
ننسى روحي ننسى إسمي وكلامي ورسمي ...
وساعات نتفكر
نتفكر أيام فاتوا
أحاسيس خباوا وماتوا
وجيعة قلبي وسكاتو
نرجع من جديد لتوة، لغدوة ألي جاي ، رغم إنو يفجع
و نعرف أنو ألي تعدى وفات مات ... لا إنت تعود ولا أنا نرجع

II بلا عنوان

,شمعة تنير ظلمة المكان
...وفكرة  شريدة تزيد سواد الليل حلكة
,ضياع يغزو عقلي من جديد
. وروحي باب مجهول لمفتاح ضائع
,  أمل اتحاشى  رؤيته
: حال يتعبني ولا أغير من ملامحه شيئاً
,  ناس تهجر ولا أملك لبقائها شيئاً
... وناس تأتي ولا أملك لرحيلها شيئاً
,  قهوة  يتصاعد بخارها،  أوراق محترقة
... رمادها تساقط  تذره أنفاسي فيتصاعد خيالاً قاتماً لا صاحب له
, رفيقة  هائمة  بين التردد  والخوف من الآتي
...  تجمح افكارها الطفولية عالية الصوت  وتكبحها
,  و أناي الشاردة  بين ضجيج  عقلي و حكايات الرفيقة
اكتب في كنشي الصغير كما هي العادة؛
.تنطفئ الشمعة
,وتأتي  فكرة جديدة  بنور  باهت لكنه نور على كل حال
 ... أضع قلمي جانباً ، أطوي الصفحة  وأنام
... أنام لأحلم بفكرتي،  بنورها ، بما يأتي من بعدها

   13-03-11                            

كن كما شئت

تأخذني إلى دنياك غصباً,
تأسرني في إحدى الجزر.. 
ريح بعدك تعوي و ذئاب خوفي تمر ...
تشرق بسمتك وصلاً, فيحلو المر ...
يأسرني برودك, يقتلني, لا يسر ... 
تبخل بما يروي ضمئي
وأهديك قلبي روحي والعمر .
كن كما شئت,
لا تبالي بما أصاب نفسي من خدر ...
تجبٌر, تكبٌر, خذ صمتك و ارحل!
افعل ما شئت و كن كما تشاء ,
فمثلي من ينسى الحذر ...

سكات

وقت تحس قلبك يتعصر...
وتسكت ...
وجيعة أمر من هزان الجمر ...
وتسكت ...
تتخنق بكلمتك، 
تزيد تحرقك دمعتك....
وتسكت ...
تبلع ريقك وتقول نسيت،
تصيح الذكرى تقول حييت ،
تسمعها وتسكت ...
تتفكر، تسرح ...
أفكارك بالشوق تجمح ،
خزرات للخد تجرح ...
تتبننها أما ما تنجم كان تسكت ...
شبيني نتكلم ماو كلو سكات, اسكت !!!
اهرب!! اتوجع , إتخلع,إتبلع ... و زيد اسكت !!
....

بلا عنوان

أهواها وتقتل في الحياة،

تأخذني لعالم الأموات ...

تسقيني شوقاً في سكات...
تمنعني من الصلاة !
كيف لا وفي عشقها مناجاة .
تغدق كلماتها شعري صفحات...
همسات، زفرات، تتولاها الشهقات...
سيئاتها حسنات ،
شيطان أمرد هي وفي عين الوقت تملأ روحي من الايمان قبسات ،
تراتيل شوق مورقات ...
تذهب نار روحي والعبرات ،
أتيه فتحييني منها نظارات ،

على املها يائسات ...       

وهم هذا الذي يسحقني أم جنون شاعرات ؟
محض زندقة أم لهو نفسي كلمات ؟
أسطر تدني موتي، تخطفني دقائق معدودات،
ترجعني لحقيقة  تهت عنها ساعات ...

تسقيني مر الحسرات ...
من أنت  يا سيدات الفاتنات ،
محيية المقبورات،
ململمة حطامي والشتات..
وموقظة أفكاري الحائرات ؟
من أنت؟ كيف جئت؟ ولم احرقت أفكاراً شاردات ...
ودمرت بلدات روحي العامرات ؟ 

20 ديسمبر 2012
06:57:02  

نسيتني؟

قداش توحشتك وتوحشت سلامك...
و توليفك وكلامك ,
والتفدليك والضحكة و حتى الكلام الخايب وصياحك
وغشك علي ودلالك ,
توحشت نحط راسي في حجرك
و حنية يدك في شعري ترويني ...
و كيف نتشيطن تدافع علي وتحميني ...
 نتفكر أيامات صغري ما خليت علاش حكيتلي,
وقداش كيف بكيت سكتني وغنيتلي ...
 وبعدها هربت ...
مشيت وخليتني,
 لا سألت ولا جيت هزيتني...
نسيتني؟؟
ولا تعلم في الصبر ؟؟
 توحشتك...
وتوحشت أيامك و ضحكتك ودلالك ...       

اسئلة بلا عنوان

علاش البشر ديمة يندم علي فات
وينبش في القديم  وألي مات  ؟؟
يتأزم كيف يتفكر  حكايات جرات،
  يرجع ديمة لوين عينه بكات ...
يتفكر جروحه ويقص إذا الذكريات حلات ...
علاش ديمة كيف يفوت الفوت،

يرجع لشنية كان ينجم يعمل وما عملش...
وعلاش يعمل وما يخممش ؟
علاش في مواقف يسكت في عز الكلام ،
وفي أخرى  ما يتفهمش ...

علاش ناس تغش  و في الشوك ترش؟؟

وكيف تشوف الورد تجري بش تقطف،

  وهي عمرها لا تحن و لا تعطف ...
علاش العوج فينا طبع ؟؟

علاش دنيتنا كيف النوارة أما بلا ريحة،
  عبادها تستنالك في  الطريحة  ...
علاش  كيف تبدأ شوية صريحة،
  تولي عند الناس قبيحة ؟؟
يولي كلامها رصاص مڨرون ،
إذا ما خلاتش في قلبها  الشي مخزون...
علاش ما نحبوش  كلمة الحق ،
إذا على حسن نية بيها الواحد نطق ...
علاش ما يعيش فيها كان   الكذاب  و الرهدان
والمنافق  و السهتان ؟؟
علاش ألي حده حد الحيط  والخلوق والمطلوق،
  يعيش معاهم مخنوق...
علاش الدنيا والعكس،  الغني شايخ ،
والفقير  يزيد يدفع المكس ...
علاش كيف تلوج الفرحة  تهرب عليك
وفي بلاصتها الوجيعة تجيك ...
 علاش كيف تصيح ما يسمعك حد
وكيف يتوجعوا ما تنجم كان تجريلهم،

و عالفرج تحكيلهم ...
  برشة اسئلة  والأجوبة  ما فماش ...
تسأل تسأل ، تتعب وما تلقاش ...
واحد يقلك عند ربي خير ،
ولاخر  يقلك عادي وأكثر من هكا مازال يصير ...
تزيد تحير ،تحب تجنح ، تهرب وتطير ...
تلوج على الدنيا ألي صوروهالك وردية في سلسلة سحر وعبير ...

أنطق !!

 ...لا هو  عاجبني  و لا عاجبو خط سيري
,تعارض وتنقد ... يقلك كانك شاطر راك جبت غيري
,و كانو فالح  راهو جاء من البارح
...كلامه يوجع  و فعله جارح

,عوج ودمار... وناس تلعب  عالأوتار
,والشعب  مسكين إحتار  اش يعمل واش يختار
 ...هذا يحكيلو على تونس الجنة   و  لاخر يوصفلو في النار  

!!!ما تسمعش كلامو راك غلبت علي!! أنطق
!!!هلقد قلبك سقيفة ولا عاملو فندق ؟؟

,شوف  المحتاج والمحروم
,والمجروح والمظلوم
...أخزرلهم !! ما نظنش تنجم تسكت
!!يزي  راك غلبت علي  ! أنطق

       Ali.BenJ's photos

أنثى

هي في الصبح طفلة  ترتوي من ضحكات الشمس
  وفي الغسق تحاكي خيالات النجوم
هي الشيطان  يسقي عطش  الضمآن  إذا إشتهى
وملك يناجي  الله تقربا
هي لوعة المشتاق إذا بكى
 و ضحكة الحالم  تاخده الروح إلى المنتهى
 هي الحنان إن كنت خاصمتها

والجفاء إن أنت وصلتها
هي امرأتان
تغرقك الأولى لتحييك الثانية
مجهولة تألفها
كمعزوفة نسيت أن تعرفها
 هي  الزهر مغسولا بنسائم الطل
 والخنجر إذا إنسل
هي الشجر  العتيق يظللك
ورمل الصحراء يحرقك
هي الجنون  تجسد
فمن يحضن الموت  إذا أتاه
ويرفع نخب من به أطاح
 

نسمات' ليلية'

إلى نفسي : أعلن التمرد و العصيان على كل مبادئك الاسطورية ،

سأتلف أحلامك الجورية ...
سيري إلى زوال يا رفيقة نخرها الخوف و أكلها النسيان ...
إلى القبور يا من علمتني الحلم و الغفران ...
وداعا... يا خوفا  كبلني،
وداعا... يا صمتا الجمني ،

وداعا... يا جبنا لم يرحم ضعفي و أحرقني  ...  

إلى سطور سأكتبها حنينا إلى أناي الماضية: ستأكلك النيران ،  

أو تنتهين حروفا يخطها آخر حيران ...

لن أخفي أفكاري المجنونة  ولا أحلامي الملعونة  ...
سأمضي إلى صفوف الشجعان ،
لن تثنيني الأحزان ... 

إلى من ظنت يوما أني في دور الضحية  باقية: لن أعود،
لن استسلم للوعود ...
لن أخر للسجود ، لبؤسي المهعود   ...
لن ارضى بالموجود ...
سأنسى صبر الحدود ...
وداعا يا طريقا اخترته فأتاني  الرد مسدود  مسدود 

     

 

...قلمي رصاص

 نكتب بقلم رصاص، نخربش، نصور، نشطب وساعات نقطع الورقة ...
لاني كاتبة ولا قصاص وسورتو با كيف البصاص ...
  أما الفساخ ما نستعملوش، ما نحبوش ،
و ألي يجي عالخاطر لا نجم ننساه ولا نجم ما نكتبوش ولا نسكت عليه وما نقولوش ...
نحكي على روحي وعالناس ، علي يحرك الإحساس ، علي يتعدى ويخطر عالراس...
عشقي، قلم رصاص و ورقة صفراء مستحمرة... قديمة قدم النحاس عمرها بالأعوام يتقاس ...
يقول القايل مهبولة ولا متكيفة ومزطولة، من جميع المواضيع ما اختارت كان قلم!!  تي تعلم من غيرك وأحكي عالعلم ...
نحبو... ما نعرفش علاش أما نحبو ...
ممكن ساعات كلامي كيفو ...ولا بالنسبة لي كي الفارس سيفو...
وممكن  ريحة و وشم  تفكرني بالحبيب وطيفو  وكذبو  وزيفو  ...
كان نلقى نسبو أما ما نعرفش علاش نقعد  ديمة نحبو ...
نحكي عليه ؟ ولا على قلم الرصاص ...

اكتب ولكن

اكتب  ولكن ، حبري  أسود  و ريشتي أدماها التعب ...
اكتب لا لشيء  إلا لإطفاء اللهب ،
لرمي الشوق ، أداة العتب ...
لأنسى شعورا  في قلبي وثب ،
لأنسى جارحا  إحتلني لا بل  غصب ...
اكتب فيعتريني الغضب ،
يحرقني كأني من حطب ...
اكتب حتى لا يخنقني  العطب ...
حروف من عجب ...
ذكرى لماض ذهب ،
لحياة الكرب ،
لعمر ضاع بلا سبب ...
اكتب هربا من دنيا  الصخب ،
من صحب  الكذب  ،
لوجع التعب   ،
لصفو سلب   ...
اكتب ، ففي الحروف خير  منقلب ،
لمن مثلي مغترب ،
ليوم مرتقب ،
ادعو فهل تراه يستجب ...

a little corner for my whispers

When we can't afford words,
when we aren't brave enough to admit things,
when we remain silent,
when we keep running away from the only truth we know,
when we shut all doors and break all bridges,
when we stop thinking right,
when we give up fighting,
when we surround to anguish and sorrow,
when pain fills our souls,
when we let fear's ghosts hunt us down,
when we loose hope,
when we  beg for a ray of light,
when we scrounge for this dark shade to vanish ,
is there any remedy or that should announce the beginning of the end ???

تدور تدور وتتخبى بين السطور

تكون فرحان شايخ... و بعد في ثانية ما تعرفش شنية يصير ...
تبدأ تحس في حاجة تسري فيك تمشي و تطلع... تزيد تطلع...
تخنقك، تحصرك تقتلك بالحيا...
تتوجع، تصيح و تبكي...
يغلبك البكاء تتبسم ، تضحك ، تسكت ...
تكتب، تصور، تفد و ترجع تبكي ...

 تلعب عليك الذاكرة... أتعس حيلة في الوجود ،
 تتفكر أحلى حاجات أما فيسع تنسى...تشد كان الخايب ،
 تزيد تتوجع تسرح تهيم تحلم ...

يجي شكون يقص عليك ،
 تحكي معاه عادي كأن لا وجيعة ولا هم يحزنون ...
تكتشف أنك تستحق أوسكار أفضل ممثل لأفضل فيلم ، فيلم حياتك بحلوها
 و سورتو مرها...
 تتنهد ، تدمع عينك،
تسكت ، تحاول تنسى ...

تخرج،  تمشي... تصيح، تسرح، تنسى الوقت ... 
 تحكي وحدك   يخزرولك، تتبسم ...
تخاف  تجري  تهرب  تاقف 
ما تلقى ما تعمل ترجع للدنيا
  تتوحش الناس  تتوحش روحك  تضيع المفتاح 
ترجع تلوج  تنسى    
ترجع  تهيم  
تحس روحك تدور  في   حلقة مفرغة ...
 كلام من غير صوت ... تموت من السكوت  ...
تصيح ....
 خيال  تصويرة مقطعة من كل شيرة...
  وترجع من الأول...
  تعاود نفس الحكاية من نقطة الصفر،
  أما  كل  حرف فيها يوجع أكثر من المرة ألي سبقت  

الأطلال : بوح الصمت

...حين  يخبو الكلام
... يعجز ثغرك عن الإبتسام
,تغزوك الآلام
 ,تحن للظلام
 ...تمل الملام
...تثور الروح بحثا  عن السلام
,تهرب لغد  لم تكن بامره علام
 ...لبلد الأحلام

,إلى  العدم  إلى اللامكان
...حيث  عذب الجنان
,تسير دونما إستئذان
...علك إن تهت تنسى الأحزان
...لتصرخ سراً وعلان
...لتمحي ألما جبان

...تهن ويتآكلك الجدال
...بقايا أعياها القتال
, تبني صرحا من خيال
 ,تطمح فلا تنال
...ولا يبقى لك من نفسك سوى أطلال

...تخنتيب أحاسيس

كيف تحس أنه الحلمة وصلت للأخر،
و عقلك ضاع والقلب محفر...

كيف تحس أنك أخيب ما على وجه البسيطة ،
عايش أما مش موجود على الخريطة،
لا تقدم في الدنيا ولا توخر،
 حبيت تعمل أما وصلت مخر...

كيف النفس يتقطع عليك،
تجمد الروح فيك...
كيف تحس انك غالط في حكمك،
تبكي ..تتوحش كلام أمك...

كيف شمسهم تزرق وشمسك ضلام،
 تتكلم و يهرب الكلام..
تحس روحك هايم ،

في بحور الليل عايم...

و تزيد  الهموم وتكثر لكروب...
وما تقدر كان على الهروب...

تتوحش أيام الهبال...
تقول يا ليت ألي كان مازال...

تشد القلم ،تتخنق الورقة،
وتكتب أوجاعك بالدرقة،
تزيد تتشوى وتموت مالحرقة  ...

تضحك ... صحيح خنتبت هالأحاسيس ،
أما  الوجع ... باقي في القلب  حبيس ...

...فرحانة بالعام الجديد

‎2012 على الأبواب، نحكي شوية على 2011 العظيم كيما شفته أنا ...

عام مليان بكاء ودموع أما زادة لقينا فيه وقت للضحك... عرفونا بشعب الله النبار و كنا
شعب ثوار (بفتح الثاء )خسارة تضربنا برشة في رواحنا ، بدينا و ما كملناش ...

عام الثورة (ضحكة صفراء حزينة )... ألي ما كملتش صحيح، أما أحيات فينا نموت نموت ويحيى الوطن، و مالت أرواحنا ومطالبنا على إذا الشعب يوماً أراد...

عرفنا شمعناها الدموع ألي تحرق الڨلب قبل الڨراجم؛ كيف تسمع أول مرة صوت كرتوشة تخطف الخوف معاها وتمشي ؛كيف تتضرب أختك في مانيف؛ كيف شعب يربي الكبدة على اللكريموجان؛ كيف يطلع رئيسك ألي ڨطع في التلفزة يتلهمج مش عارف شنية يطلع من
باخوشو ويرن الهاتف فجعة وما نعرفوش شكون طلب (أمنية حياتي نعرف شكون ههه)

تعلمت نزغرت ،أيه أنا ألي كنت نضحك كيف أمي و خالاتي يزغرتو؛ كيف مات الشهيد برصاص الكلاب زغرتت وبكيت عليه أكثر من برشة حكايات كنت نظن قتلتني؛

كيف تتكلم ويقوللك أسكت و تقول الرب واحد والعمر واحد و بڨلة ليهم واحد واحد ...
كلنا تعلمنا فيه معنى الكلمة ، ألي نطق جديد وألي على الصوت وألي... وألي ...

قداش فرحت كيف توحدت كلمتنا ورجعنا يد وحدة و قداش بكيت كيف تفرقنا وألي فرقنا تافه
تفكرت الأفلام كيفاش الحبيب(الشعب) يسيب حبيبته (تونس) على حكاية فارغة ويندم كيف يفوت وقت الندم (إن شاء الله ما يجيش هاك الوقت ) ...
كيف الخو يكفر خوه ، كيف الأم صدرها يضيق بأولادها، كيف الشهيد حقه يضيع وصوت أهله يبحاح عليه ،كيف ثورة الكرامة والتشغيل يتعدى عليها عام ولا كرامة تحفظت ولا حق رجع و لا بطال خدم ...
كيف الناس تخزرلك مستغربة كيف تجي العين في العين وتقلهم صباح النور
برشة حاجات يوجعو أما كيف ما يقول المثل من يتألم أكثر يعرف أكثر ، إن شاء الله ما نطلعوش لا من الفول ولا من القشور ، بلا معرفة والقلب مكسور ...

نكتب ونقول الزح ملا دراما كوين هههه ، انشاالله عامكم مبروك سعيد ،عام الكرامة والحرية وبالكشي التشغيل وحقوق الزوالي زادة ، شكون يعرف ...

تحية مني للمحتحت وألي مش لاقي قوت نهاره وخدام الحزام والفلاح وألي عرقه شراتل ولا نجم يعيش ولا يعيش (شدة على الياء ) ،تحية للمنسيين والمعدمين وألي تحت خط الفقر ميتين حيين... (رجعت للتعاسة و اش بش يفكنا ....)
نهاركم زين ، مش الهاربين أما المشدودين والمحاكمين ،ضحكت ، أما عادي نجمو نلقاو مصباح علاء الدين ولا يحشموا على رواحهم السياسيين...
هاني بش نحشم على نفسي ونسكت أما قبلها هدية لكل ألي يحبو تونس
http://www.youtube.com/watch?v=XARZtIawMvk